काठमाडौँ । संगीतको दुनियाँमा आफ्नो स्वरको जादु छरेर चर्चामा रहेकी लोकप्रिय गायिका मेनुका पौडेलको जीवनमा अर्को वरदान प्राप्त भएको छ । गायन कला उनको पहिलो वरदान थियो, जसको प्रमाण उनले इन्डियन आइडलमा आफ्नो धमाकेदार प्रस्तुतिमार्फत देखाइसकेकी छन् । उनले अर्को वरदानस्वरुप कृत्रिम रुपमै भए आँखाको सामान्य ज्योति प्राप्त गर्न सक्ने भएकी छन् । जन्मजात दृष्टिविहीन मेनुकाको विशेष प्रविधिमार्फत आँखाको उपचार गरिँदै छ । उपचार सफल भएमा उनले अरुको सहाराविना आफैँ हिँडडुल गर्न, मान्छे चिन्न र पढ्न समेत सक्ने बताइएको छ ।
इन्डियन आइडलको १४ औँ सिजनको अडिसनमा गोल्डेन माइक जितेर टप १५ मा परेकी मेनुका लगातार जजहरूको मन जित्न सफल भएकी छन् । गत मंसिरमा ‘तुम्हारे बिना हमरा कोनो नही…’ बोलको हिन्दी क्लासिकल गीत गाएर उनी उक्त आइडलको टप १५ मा पुग्न सफल भएकी थिइन् । त्यसयता थुप्रै प्रस्तुति दिइसकेकी मेनुका इन्डियन आइडलको उत्कृष्ट १० मा छनोट भएकी छन् । आइतबार साँझ प्रसारित कार्यक्रममा उनी टप टेनमा परेको घोषणा गरिएको थियो । भारतीय गायिका आशा भोस्लेको ‘कजरा मोहब्बत वाला’ र ‘पान खाए सैयाँ हमारो’ बोलका दुई गीत गाएलगत्तै मेनुकालाई जजहरूले उत्कृष्ट १० मा छनोट गरेका थिए ।
त्यसै दिनको कार्यक्रममा मेनुकाको आँखाको उपचार हुन लागेको र कृत्रिम लेन्सको सहायतले उनले देख्न सक्नेबारे जानकारी दिइएको थियो । इन्डियन आइडल टिमले नै उनको आँखाको उपचारमा सघाइरहेको छ । आइडलको टिमले यसैसाता मुम्बईका एक प्रतिष्ठित आँखा डाक्टरसँग जाँच गराएको र मेनुकाले देख्न सक्नेबारे आइतबारको कार्यक्रममा प्रस्तोता हुसेनले जानकारी दिएका थिए ।
मेनुकाको आँखाको अवस्था जाँच गरेका डाक्टरले उनको आँखाको अप्टिक नर्भले काम नगरेको बताएका छन् । सोही कारण उनले पूर्णरुपमा देख्न सक्ने सम्भावना भने छैन । तर आफूहरूसँग विशेष खालको उपकरण रहेको र त्यसलाई मेनुकाको आँखामा जडान गरेपछि उनले धेरै कुराहरू देख्न सक्ने ती डाक्टरको भनाइ छ । यदि डाक्टरले भनेअनुसार उनले देख्न सकेमा उनी एक्लै हिँड्न, मान्छेको अनुहार पहिचान गर्न, आफ्ना अगाडि को उभिएको छ भनेर थाहा पाउन र किताब पढ्न समेत सक्नेछिन् । डाक्टरले कार्यक्रममै यो कुरा सुनाइरहँदा उपस्थित जज लगायत उनका प्रशंसहरूमा खुसी थपेको थियो । जजमध्येकी श्रेया घोषालले त्यो उपकरण मेनुकाले कहिले लगाउन पाउलिन् र सुन्दर बिहानी देख्लिन् भन्ने आफूमा हुटहुटी भइरहेको बताइन् ।
संसारमा उज्यालो समेत छ भन्ने कुरा देख्न र महसुस गर्न नसकेकी मेनुकाले उक्त उपकरणको सहारामा धेरै कुराको नयाँ अनुभव गर्ने छिन् । यसले उनको जीवनमा ठूलो सहायता हुने बताइएको छ । उपचार हुने भएपछि मेनुकाले पनि आफू संसार देख्न उत्साहित रहेको प्रतिक्रिया दिएकी छन् ।
मेनुकाले इन्डियन आइडलमा सुरुदेखि नै जज श्रेया घोषालबाट विशेष प्रशंसा र माया पाएकी छन् । आइडलका अन्य जजबाट पनि उत्तिकै प्रशंसा पाएकी छन् । भारतका प्रसिद्ध गायगायिका नीतिनमुकेश, अनुराधा पौडवाल, साधना सरगम, कविता कृष्णमूर्ति तथा लता मङ्गेशकर र आशा भोस्लेका गीतमा सङ्गीत भरेका वरिष्ठ सङ्गीतकार कल्याणजी, अभिनेता रणवीर कपुरलगायत थुप्रैले मेनुकाको गायन कलाको प्रशंसा गरेका छन् । मेनुकाले लता मङ्गेशकर र आशा भोस्लेका गीतहरु बढी गाउने गरेकी छन् । मङ्गेशकरको ‘चन्दन सा बदन चञ्चल…’ बोलको गीत गाउँदा कार्यक्रममै उपस्थित रहेका उक्त गीतका सङ्गीतकार कल्याणजीले त मेनुकालाई लता मङ्गेशकरसँगै जोडेर तारिफ गरेका थिए ।
नेपाल आइडलको अधुरो यात्रादेखि इन्डिय आइडलको टप १० सम्म पुग्न सफल लोकप्रिय गायिका मेनुका शारीरिक रुपले फरक क्षमता भए पनि उनीभित्रको प्रतिभाका कारण सबल छिन् । उनीसँग आँखाको ज्योति नभए पनि ईश्वरले हृदयको ज्योति दिएका छन् । प्रतिभा र अद्भुत कला दिएका छन् । अब उनले कृत्रिम उपकरणमार्फत थोरै भए पनि संसार देख्न पाउने खबरले उनका प्रशंसकहरूमा खुसी थपिदिएको छ ।
news24nepal
