काठमाडौं—रास्वपाका अर्का उम्मेदवार पनि कालोसूचीमा रहेको पाइएको छ । सर्लाही–३ बाट रास्वपाको उम्मेदवार बनेका नरेन्द्र साह कलवार कर्जा सूचना केन्द्रको कालोसूचीमा परेको पाइएको हो ।
यसअघि कर्जासूचना केन्द्रको कालोसूचीमा परेको भन्दै धनुषा क्षेत्र नम्बर–१ बाट रास्वपाकै उम्मेदवार किशोरी साहको उम्मेदवारी खारेज भएको थियो । कलवार ठेक्का लिएर अलपत्र पारेको अभियोगमा २०८१ मंसिर ५ गते कालोसूचीमा परेका थिए । जुन अहिलेसम्म कायमै रहेको देखिन्छ ।
निर्माण व्यवसायमा सम्बद्ध उनीमाथि ठेक्का लिएका विभिन्न आयोजना अलपत्र पारेको आरोप समेत लाग्ने गरेको छ ।
यसअघिको निर्वाचनमा माओवादी केन्द्रबाट उम्मेदवार रहेका उनी एमालेका हरिप्रसाद उप्रेतीसँग झिनो मतान्तरमा पराजित भएका थिए । अहिले उनले रास्वपाबाट उम्मेदवारी दिएका छन् ।
