काठमाडौं । प्रधानमन्त्री शेरबहादुर देउवा र नेकपा एमाले अध्यक्ष केपी शर्मा ओलीबीच मंगलबार साँझ भेटवार्ता भएको छ । प्रधानमन्त्री निवास बालुवाटारमा भएको दुईबीचको भेटवार्तामा अमेरिकी सहायता परियोजना मिलेनियम च्यालेन्ज कर्पाेरेशन (एमसीसी) र संसद् अवरुद्धबारे कुराकानी भएको एमाले नेता विष्णु रिजालले जानकारी दिए।
भेटमा प्रधानमन्त्री देउवाले सत्ता गठबन्धन दल नेकपा माओवादी, नेकपा (एकीकृत समाजवादी) लगायत दलले एमसीसी पारित गर्न असहयोग गरेको बताएका थिए । साथै, प्रधानमन्त्री देउवाले संसद्बाट एमसीसी पारित गर्न एमालेको सहयोग मागेको पनि नेता रिजालले बताए ।
उनले सामाजिक सञ्जाल फेसबुकमार्फत भने, ‘आज साँझ प्रधानमन्त्री शेरबहादुर देउवा र हाम्रो पार्टीका अध्यक्ष केपी शर्मा ओलीबीच प्रधानमन्त्री निवास बालुवटारमा भेटवार्ता भएको छ । भेटका क्रममा प्रधानमन्त्रीज्यूले हाम्रो पार्टीसमक्ष सत्तारुढ गठबन्धनभित्रबाटै आफ्नो सरकारलाई असहयोग भएकाले प्रतिनिधिसभामा प्रस्तुत मिलेनियम च्यालेन्ज कम्प्याक्ट (एमसीसी) अनुमोदनमा सहयोगका लागि आग्रह गर्नुभयो ।’
जवाफमा अध्यक्ष ओलीले एमाले छाडेर गएका माधव नेपालसहित १४ सांसदलाई कारबाही गरेमा सहयोग गर्न सकिने संकेत देखाएका छन् । ओलीको भनाइ उद्धृत गर्दै रिजालले उनले भने, ‘हाम्रा पार्टी अध्यक्ष कमरेडले आफ्नो पार्टीले विगत छ महिनादेखि जायज मागहरु राखी सदनमा आवाज उठाइरहेको स्मरण गराउँदै ती मागहरु पूरा नभएसम्म अन्य कुनै पनि संसदीय प्रक्रियामा प्रवेश गर्न नसक्ने कुरा पुनः स्पष्ट पार्नुभएको छ ।’
भेटवार्तामा अध्यक्ष ओलीसँगै एमाले वरिष्ठ उपाध्यक्ष ईश्वर पोखरेल, उपाध्यक्ष विष्णुप्रसाद पौडेल र उपमहासचिव विष्णु रिमाल सहभागी रहेका थिए ।
