२८ फागुन २०८२, बिहीबार/ काठमाडौँ। साउदी अरबको रक्षा मन्त्रालयले आफ्नो देशमा पठाइएका १८ वटा ड्रोन खसालेको दाबी गरेको छ । देशको पूर्वी क्षेत्रमा आएका १८ वटा ड्रोन खसालिएको मन्त्रालएको दाबी छ ।
सरकारी समाचार एजेन्सी साउदी प्रेस एजेन्सीका अनुसार पछिल्ला केही दिनमा धेरै ड्रोनहरूलाई आकाशमै इन्टरसेप्ट गरी नष्ट गरिएको हो । तर, ती ड्रोन कसले पठाएको थियो भन्नेबारे खुलाइएको छैन ।
अमेरिका र इजराइलले इरानमाथि आक्रमण सुरु गरेपछि मध्यपूर्वमा तनाव बढेको छ । इरानमा अमेरिका र इजरायलले भीषण हमला गरेपछि इरानले पनि मध्यपूर्वमा रहेका अनेरिकी बेसमा आक्रमण जारी राखेको छ ।
२८ फागुन २०८२, बिहीबार /काठमाडौँ। मध्यपूर्व क्षेत्रमा बढ्दो युद्धको प्रभाव काठमाडौँ उपत्यकामा पनि देखिन थालेको छ। केही दिन यता बजारमा खाना पकाउने ग्यासको अभाव हुन थालेपछि सर्वसाधारणले कठिनाइ भोग्न थालेका छन् ।
ग्यास अभावका कारण उपभोक्ताहरू ग्यास लिनका लागि काठमाडौँको बालाजु औद्योगिक क्षेत्रमा रहेको नेपाल ग्यास वितरण केन्द्रमा लाइन बस्न बाध्य भएका छन्। बिहानैदेखि उपभोक्ताहरू सिलिन्डर बोकेर लाइनमा बसेका दृश्य देख्न सकिन्छ।
२८ फागुन २०८२, बिहीबार \काठमाडौँ। सुर्खेतकी १६ वर्षीया किशोरी इनिसा विक माथि भएको बीभत्स सामूहिक बलात्कार र हत्याको घटनाले देशलाई नै स्तब्ध बनाएको छ। यस जघन्य अपराधको विरुद्धमा राष्ट्रिय स्वतन्त्र पार्टीका सांसद शिशिर खनालले प्रतिक्रिया दिँदै राज्यको सुरक्षा संयन्त्र र प्रणालीको असफलतामाथि प्रश्न उठाएका छन्।
सामाजिक सञ्जाल फेसबुकमार्फत आफ्नो धारणा सार्वजनिक गर्दै खनालले किशोरीहरूले सुरक्षित रूपमा बाँच्न पाउने मौलिक अधिकार समेत गुमाउनुपर्ने अवस्था आउनु गम्भीर चिन्ताको विषय भएको बताएका छन्। सांसद खनालले पीडित परिवारप्रति गहिरो समवेदना प्रकट गर्दै इनिसाको आत्माको चिर शान्तिको कामना गरेका छन्।
उनले महिला तथा बालबालिकामाथि हुने यस्ता यौन हिंसा, बलात्कार र हत्या जस्ता क्रूर कृत्यहरू कुनै पनि हालतमा स्वीकार्य नहुने स्पष्ट पारेका छन्। यस घटनाको तुरुन्त र निष्पक्ष अनुसन्धान गरी दोषीहरूलाई कडा कानुनी दायरामा ल्याउन उनले गृह मन्त्रालयको गम्भीर ध्यानाकर्षण गराएका छन्। पीडित परिवारले न्याय पाउनु अनिवार्य रहेको भन्दै खनालले दोषीमाथि हुने कारबाहीले मात्रै नपुग्ने बरु समग्र कानुनी संरचना नै परिवर्तन गर्नुपर्नेमा जोड दिएका छन्।
सांसद खनालका अनुसार अपराधीलाई कारबाही गर्नुका साथै आगामी दिनमा यस्ता घटना दोहोरिन नदिन कानुनी संरचनालाई थप सबल र प्रभावकारी बनाउनु पर्छ। महिला र बालबालिकाहरू डर र असुरक्षाको भावनाबिना सम्मानपूर्वक बाँच्न सक्ने वातावरण निर्माण गर्नु राज्यको प्राथमिक जिम्मेवारी भएको उनको ठहर छ।
